Почна расчистувањето на локалитетот „Табакана“ во Куманово кој според најавите на локалната власт ќе стане уреден простор, соопшти денеска градоначалникот на Куманово, Максим Димитриевски
– Продолжуваме со дислокација на времените објекти (кен куќички) на оваа локација со цел да се прошири капацитетот за паркирање на возила и изградба на детско катче и урбан сквер. Апелирам до сопствениците на времените објекти да ги дислоцираат контејнерите од државен имот на сопствена сметка, во спротивно општината ќе ги дислоцира преку фирма извршител и ќе ја наплати услугата од сопствениците-соопшти Димитриевски.
На прес-конференција Димитриевски ги отфрли шпекулациите дека на оваа локација се планира изградба на нов станбено-деловен комплекс. Тој појасни дека деталниот урбанистички план кој предвидувал таква можност бил донесен во период пред тој да ја преземе функцијата градоначалник, но актуелната локална власт нема намера да реализира нови градби на оваа локација.
– Првин сакам да ги отфрлам сите шпекулации што се однесуваат на локалитетот „Табакана“. Донесен е ДУП во минатото, пред да бидам градоначалник, со кој на таа локација имало можност за изградба на станбено-деловен комплекс. Додека јас сум градоначалник, такво нешто нема да се случи-изјави Димитриевски.
На локацијата ќе се изградат нови паркинг места, како и урбан сквер. До крајот на годината надлежните најавија и уредување на местата во центарот на градот, каде неодамна се отстранија угостителски објекти. Во Куманово на три места ќе се градат урбани скверови, информираа надлежните. На последната седница на Советот со ребалансот на буџетот беа одвоени 9, 5 милиони денари за уредување на овие простори.
