За гребнат ретровизор, му поставиле заседа како за крвна одмазда. Банален сообраќаен инцидент во Шишево, се претворил во вооружена пресметка за која двајца браќа ќе одговараат за обид за убиство.
Обвинителството истражува двајца браќа на возраст од 43 и 44 година во скопско Шишево.
Во саботата, двајца возачи се разминале во близина на авто-плац, но се случил мал сообраќаен инцидент со гребаница на ретровизорот. Но наместо европски записник, започнала расправија, а следувала и вербална пресметка. Еден од осомничените го фатил другиот возач за врат и му се заканувал, но сведоци успеале да ја смират ситуацијата, покажала истрага досега. Сепак, конфликтот не завршил таму.
Откако нападнатиот ја зел сопругата од работа, го повикал својот брат за да провери дали патот е безбеден за враќање. Но, во близина на местото каде што претходно избувнала расправијата, двајцата осомничени, ги чекале скриени во грмушки и вооружени со пиштоли. Во моментот кога возилото поминувало покрај нив, едниот од браќата испукал два куршума. Еден од проектилите го погодил братот на претходно нападнатиот маж во главата, нанесувајќи му тангенцијална повреда, односно завршил само со површинска рана.
- „Со пукањето биле загрозени и уште две лица кои се наоѓале во близина. Јавниот обвинител за двајцата осомничени побара притвор. Тие се товарат врз основа на сомнение дека се соизвршители на кривично дело – Убиство според член 123 став 2 точка 3 во врска со член 19 (во обид)“ стои во соопштението од ОЈО .
Поради опасност од бегство, можност за влијание врз сведоци и ризик осомничените да го повторат или довршат делото за кое се гонат, судот го прифатил предлогот на обвинителството двајцата браќа да одат во притвор 30 дена.
