Територијалната противпожарна единица (ТППЕ) – Битола од денеска има две нови пожарникарски возила, донација обезбедена во рамки на македонско-грчкиот проект „Firefly“ поддржан од Европската Унија.
Во изјава за медиумите, заменик министерот за локална самоуправа Ерџан Селими истакна дека превенцијата и навременото справување со шумските пожари мора да биде приоритет на секоја институција.
-Проектот „Firefly“ е конкретен пример како прекуграничната соработка дава практични резултати за граѓаните. Со поддршка од Европската унија, институциите од Македонија и Грција заедно работат во зајакнување на капацитетите за рано откривање, превенција и ефикасно управување со шумските пожари. Вкупната вредност на овој проект изнесува 545.680 евра, а од нив 20 проценти се со кофинансирање од Министерството за локална самоуправа. Со овие средства обезбедивме современа опрема за заштита на граѓаните, но и природните ресурси, истакна заменик министерот за локална самоуправа Селими.
Според градоначалникот Коњановски, со проектот се зајакнува соработката меѓу партнерите од земјава и соседна Грција и се подготвуваат заеднички механизми за превенција и брза интервенција, особено при шумски пожари.
Проектот има конкретни придобивки за пелагонискиот регион бидејќи ТППЕ Битола не ја штити само територијата на Општина Битола, туку и општините Новаци и Могила, а во многу наврати дејствувала и пошироко. Вложувањата во нејзините капацитети претставува вложување во безбедноста на целиот пелагониски регион. Преку проектот „Firefly“ се обезбедува значајна модернизација на противпожарните капацитети преку теренското противпожарно возило со специјална надградба и теренско возило од највисок ранг, нагласи градоначалникот Коњановски.
Територијалната противпожарна единица во Битола во моментов има 32 пожарникари и 18 противпожарни возила.
