Чамците и скутерите ова лето ќе имаат ограничен режим на пловење на Охридското, Преспанското и на Дојранското Езеро во согласност со одлуката што ја донесе Владата на предлог на Министерството за транспорт, со цел зголемување на безбедноста на капачите и учесниците во пловидбата.
Со одлуката се предвидува ограничување на пловидбата на скутери во периодот од 1 јули до 31 август 2026 година во термин од 11 до 19 часот.
Воедно, се воведува и ограничување за пловидбата на чамци во ноќните часови, и тоа од 3 јуни до 31 август од 21 до 5 часот, од 1 септември до 30 септември од 20 до 6 часот и од 1 октомври до 31 октомври од 19 до 6 часот.
Од Владата наведуваат дека одлуката е донесена со цел намалување на ризикот од несреќи, спречување загрозување на безбедноста на капачите и обезбедување непречено користење на езерските води, како и зачувување на јавниот ред.
Надлежните служби ќе вршат засилени контроли, а за непочитување на пропишаните ограничувања, ќе бидат преземени соодветни мерки во согласност со законските прописи.
Воедно, се апелира до сите сопственици и управувачи на скутери и чамци да ги почитуваат правилата за пловидба, означените безбедносни зони и насоките на надлежните органи.
