250 евра казна за родителите чии деца се однесуваат насилно во училиште. Со новите законски измени се предвидуваат парични казни за родителите на децата кои во училиште прават булнг и малтретираат соученици. Ќе има казни за оние родители кои одбиваат да соработуваат со училиштата и институциите. Според најавите од Министерството за образование и наука, новите измени во законот за основно образование, веќе се во завршна фаза и наскоро ќе бидат доставени до Собранието.
„Државниот секретар е во постојан контакт со пратениците и мислам дека во овој момент се во собрание, за да ги дооформат тие предлози и веќе тоа е донесена одлука и тие измени ќе се направат и останува казната од 250 евра за секое сторено насилно дело на детето да биде казнет родителот, но и тоа што е многу важно повторувам, и кога родителот ќе одбие да соработува со училиштето и другите институции.“- вели министерката за образование и наука Весна Јаневска.
Бројните инциденти на меѓуврсничко насилство го вклучија алармот кај инстутуциите. Напаѓачите и родителите ќе си одговараат според законот, а со новите измени дополнително родителите ќе си плаќаат и казни. Последниот случај на меѓуврсничко насилство се случи во Ченто каде средношколец влезе во основно училиште и прободе 15 годишен ученик. Детето доби повреди опасни по живот, оштетен му беше црниот дроб и вена во стомакот. Минатиот месец пак во Ѓорче Петров три девојчиња тепаа шестоодделенка, ја тераа да јаде измет од куче, ја гореа со цигари, навредуваа и снимаа со мобилен телефон. Надлежните постојано апелираат до родителите да посветат повеќе внимание на децата, нагласувајќи дека државните институции не можат сами да го решат проблемот. Покрај казните, надлежните најавија и лиценцирани училишни психолози, кои треба да формираат стручни тимови за препознавање и превенирање на насилство. Дополнително апелираат до наставниците да се постојано помеѓу учениците и заедно со стручните тимови да работат со децата, но и со родителите.