Интернационален Универзитет „Еуропа Прима“ ја започна кампањата по повод 20-годишниот јубилеј од своето формирање. На свечениот настан во Кинотека на Македонија, францускиот професор и историчар Фабрис Д’Алмеида беше прогласен за почесен член на Академијата и на Меѓународната академија за наука и уметност од Белград. Претседателот на Универзитетот, Плевнеш, ги повика младите да се приклучат на студиите на Универзитетот, кој, како што посочи, веќе станува дел од едно европско и светско академско семејство.
„Посебно сум среќен што 20-годишнината на Универзитетот ја започнуваме денес и што таа ќе трае цела година, заедно со Фабрис – еден од најголемите француски интелектуалци, со кого со години имаме размена на студенти и професори. Присутни сме на повеќе меридијани и имаме договори со 17 универзитети во светот. Веруваме дека образованието е на врвот на светската цивилизација и дека младите треба да се приклучат кон овие ретки студии што Универзитетот ги организира“, изјави Јордан Плевнеш, претседател на „Еуропа Прима“.
Професорот Фабрис Д’Алмеида се заблагодари за признанието и порача дека универзитетите денес имаат клучна улога во зачувувањето на критичката мисла и дијалогот меѓу општествата. Посочи дека неговиот универзитет, специјализиран за безбедност и социјални мрежи, ја пофали Македонија дека одлучно се бори против дезинформациите.
„Многу ми е важно што сум денес тука, бидејќи ова е значаен момент во мојата кариера – да бидам примен како член на Балканика академијата. Особено сум среќен што сум во Скопје и на Универзитетот Европа Прима, со кој имаме долгогодишна соработка. Со ректорот Плевнеш веќе 20 години работиме на заеднички студиски програми и договори. Тоа е особено важно затоа што Универзитетот е специјализиран за социјални мрежи, сајбер-криминал и сајбер-истраги, додека мојот универзитет работи во областа на безбедноста и современите безбедносни предизвици. Заеднички работиме и на темата дезинформации. Вчера имавме значајна конференција во Европскиот центар за дезинформации и гледам дека македонското општество напредува во борбата против овој предизвик“, изјави Фабрис Д’Алмеида – „Универзитетот Париз II Пантеон“.
Ректорот на Универзитетот, Александар Трајковски, посочи дека ваквите настани се можност младите да се поврзат со европската академска сцена и со светски признати професори и интелектуалци.
„Професорот Далмеида е еден од претставниците на плејадата уметници и интелектуалци што се дел од нашата академска заедница. Тоа е и пораката што сакаме да ја испратиме – дека со посветеност, напорна работа и истрајност, сите што вложуваат во себе, во културата и уметноста, можат да се издигнат до највисоките академски врвови“, изјави Александар Трајковски – ректор на Универзитетот „Еуропа Прима“.
На настанот присуствуваа професори, академици, студенти и гости од земјата и странство, а со него официјално беше означен почетокот на одбележувањето на 20-годишниот јубилеј на Интернационален Универзитет „Еуропа Прима“.
