Македонската храна и вино, автентичната гастрономија и традиционалната музика, ќе бидат главните вредности со кои земјава ќе се претстави на светскиот саем ЕКСПО 2027 кој годинава се одржува во Белград. На изложбата на која досега се пријавени 135 држави, Македонија ќе настапи под слоганот „Сите ритми на сонцето“, со цел да ги привлече посетителите и да ја промовира државата како атрактивна туристичка дестинација.
„Македонија настапува под слоганот „Сите ритми на сонцето“, македонското сонце најсилно грее и ние тематски одбравме седум сектори кои што генереално ќе ги претставиме. „Македо“ се однесува на македонската музика, вино, гастрономија, природа, култура и уметност, гостопримство и „Што можам да правам кога сум во Македонија?“, изјави Александар Велиновски, комесар на македонскиот павилјон во Белград.
Македонскиот павилјон на ЕКСПО и Сојузот на стопанските комори на Македонија отворија официјална интернет-платформа преку која компатиите ќе имаат можност да се пријават за учество на изложбата, а рокот за аплицирање е до 1-ви септември. За нив се обезбедени обуки, подготовка и бесплатна техничка поддршка, а во текот на изложбата ќе бидат организирани шест тематски недели посветени на различни индустрии.
„Дадени сегменти од нашата економија ќе можат да се претстават таму, со цел да ги потенцираме тие сегменти каде што има најголема можност за економски раст. Сметам дека таков период е од исклучително значење бидејќи имаме дадени сегменти од нашата македонска економија кои што може да се презентираат таму и покрај личниот бенефит, да создадат и бенефит и за нашата држава“, изјави Горан Ѓорѓиевски, претседател на Сојузот на стопански комори на Македонија.
ЕКСПО оваа година ќе се одржи од 15-ти мај до 15-ти август и се очекува да привлече милиони посетители. За македонските компании, ова ќе биде можност да ги промовираат своите производи и услуги и да се претстават пред потенцијални деловни партнери.