Општина Илинден продолжува со инвестиции во спортската инфраструктура и создавањето современи услови за спорт и рекреација во сите населени места. Во рамки на Програмата за реконструкција на спортски игралишта, започна реконструкцијата на мултинаменското спортско игралиште во населеното место Марино, со што граѓаните ќе добијат безбеден и функционален простор за спортски активности.
Како што соопштија од Општината, реконструкцијата опфаќа целосна обнова на теренот и спортската опрема. Предвидено е поставување на нова пластифицирана заштитна мрежа, бојадисување на металната конструкција, замена на кошаркарските табли и обрачи, поставување нови столбови и анкерни плочи, монтажа на 2Д заштитна мрежа, набавка на нови голови, поставување јутена мрежа зад головите, како и поставување вештачка трева на површина од над 920 метри квадратни и ПП пластични плочки на површина од над 430 метри квадратни. Во рамки на проектот ќе биде извршена и подготовка на асфалтната подлога, како и поставување нови метални профили, со што игралиштето ќе добие целосно нов и современ изглед, во согласност со предвидените технички стандарди.
-Продолжуваме со конкретни инвестиции кои директно го подобруваат квалитетот на живот на граѓаните. Со реконструкцијата на спортското игралиште во Марино создаваме современ, безбеден и функционален простор каде што младите, спортистите и сите рекреативци ќе можат да спортуваат и да го поминуваат слободното време. – истакна градоначалникот Георгиевски.
Со реализацијата на овој проект, Општина Илинден уште еднаш ја потврдува својата заложба за континуирано унапредување на условите за спорт, рекреација и здрав живот, инвестирајќи во современи и безбедни спортски содржини достапни за сите граѓани. Реконструкцијата на игралиштето во Марино претставува дел од пошироките активности на локалната самоуправа за модернизација на спортската инфраструктура низ сите населени места во општината, стои во соопштението.
