Судир на студен и влажен бран од Север со топла воздушна маса од Југ над екстремно загреано и суво тло – идеални услови за силна бура. Токму ова резултираше со екстремен ветер со брзина од над 100 километри на час.
Во вакви околности се создава моќен облак со карактеристичен изглед на карфиол, а водената пареа во него почнува да кондензира и се создаваат капки. Тие можат да задржат огромни количини на вода, па затоа врнежите се појавуваат во вид на густи завеси од дожд и град.
„Иако официјалната температура е 37-39 степени, температурата на тлото е повисока особено во градските подрачја, наидувањата на студен и воздух со многу влага предизвикува кондензација и развој на олујни облаци кои се пренесуваат со голема брзина“ – вели метеорологот Борис Секирарски.
Метеоролозите објаснуваат дека ваквите екстремни временски феномени ќе стануваат почести поради климатските промени, врелиот појас од Северна Африка се почесто стигнува и над Јужна Европа односно Македонија.
„Имавме топлотни бранови, имавме и присуство на прав од Сахара кој придонесе за овие силни процеси, зголеменото количество на прав во воздухот е и подлога за создавање врнежи, повеќе топлотни бранови и високата температура на морето донесоа овие процеси да бидат уште посилни.“– вели Секирарски.
Во последниот бран најпогодени беа Повардарието и источните делови од Македонија, додека западниот регион и натаму се соочува со недостиг од врнежи. Вакви непогоди и порано биле забележани, но сепак ретки. Токму затоа, метеоролозите предупредуваат да не се потценува сериозноста на овие појави поради значајната брзина со која се развиваат. Апелираат до граѓаните и во наредниот период внимателно да ги следат временските предупредувања.