Во рамките на Научната и уметничка визита 2026 на Македонската академија на науките и уметностите, денеска во „Куќата на Уранија“ во Охрид се одржа лингвистичка работилница „Дијалектна обработка на македонскиот јазик“.
Работилницата ја организираше Истражувачкиот центар за ареална лингвистика „Божидар Видоески“ при МАНУ и беше посветена на обработка на нови материјали за Македонскиот дијалектен атлас.
– На денешната програма излагања имаа акад. Марјан Марковиќ и д-р Давор Јанкулоски, кој го промовираше и дигиталното издание на „Речникот на македонските говори во југоисточниот егејски дел“ од проф. д-р Коста Пеев, во рамките на одбележување на 90-годишнината од раѓањето на проф. Пеев, соопшти организаторот на работилницата.
Работилницата продолжува утре, кога ќе бидат одржани излагања на соработниците од Одделението за дијалектологија при Институтот за македонски јазик „Крсте Мисирков“ – проф. д-р Веселинка Лаброска, доп. член на МАНУ, д-р Македонка Додевска, и д-р Дарко Томовски. Нивните излагања се посветени на тековните истражувања и обработка на дијалектниот материјал.
