„Пристапен музеј, култура без бариери“ е насловена изложбата на дела изработени од лица со ментален хендикеп, што денеска беше отворена во Музеј на град Неготино, во соработка со Центар за лица со ментален хендикеп, неготинска „Порака“.
Изложени се цртани дела и предмети моделирани со глина.
– Уметноста нѐ поврзува, различноста нѐ збогатува, заедно создаваме култура без бариери, културата е за сите, заедно создаваме инклузивно општество – беше пораката упатена од настанот.
Притоа беше споделено дека проектот „Пристапен музеј, култура без бариери“ има за цел да ја приближи културата и музејското наследство до лицата со ментална попреченост преку креативни и едукативни активности.
– Преку работилници за цртање и моделирање, учесниците развиваат креативни вештини, самодоверба и активно учествуваат во културниот живот на заедницата – беше кажано на изложбата.
Драгица Чекорова, раководителка на проектот, рече дека ова е проект одобрен од Министерството за култура и туризам, како национален проект, од национален интерес, делата се работени со повеќемесечни едукативни работилници.
– Неколку месеци се работеше во рамките на едукативни работилници, каде што штитениците од „Порака“ цртаа, сликаа на хартија, на платно, со акрилни бои, фломастери, со дрвени боички. И работилниците се одржуваа во етнолошката поставка, може да се види дека мотивите за овие слики се разни етнолошки предмети, како што се стомна, тава, ѓумче, разни ќилими со убави, разновидни бои. Сето тоа беше инспирација за нив и уживаа сето тоа додека го работеа. Покрај овие слики, изработени се и предмети од глина, во калапи, во тава. Со наша помош и помош од вработените во „Порака“ – истакна Чекорова.
Неготинската градоначалничка Марија Нацева изрази задоволство од настанот и инклузијата во Неготино.
Валентина Тасева, раководителка во „Порака“ рече дека неготинскиот Музеј е меѓу оние во државата што е целосно пристапен и достапен до лицата со попреченост.
Верица Ташева, исто така, раководителка, истакна дека во „Порака“ настојуваат да ги откријат талентите на секој еден и да ги негуваат тие таленти, преку низа активности преку кои тие доаѓаат до израз.
