Секој што планира патување во Грција овој викенд треба да се вооружи со трпение или, доколку е можно, да го одложи датумот на поаѓање.
Следи еден од викендите со најголем сообраќај во сезоната, кога се очекуваат огромни застои и формирање долги редици возила на клучните гранични премини. Најголем притисок и сообраќаен метеж се предвидуваат на најфреквентните премини кон Грција – Евзони и Дојран.
Главната причина за дополнителното оптоварување е продолжениот викенд, кога се празнува 2 Август, големиот државен и верски празник Илинден. Комбинираните неработни денови ќе предизвикаат бран локални туристи и патници во транзит, што, во комбинација со редовната промена на туристичките аранжмани, ќе создаде огромни гужви.
