Општина Гевгелија започна акција за отстранување на неправилните приклучоци на атмосферски води во фекалната канализација, со цел да се намали ризикот од излевање на вода во домовите при обилни врнежи.
Од Општината информираат дека, согласно Законот за снабдување со вода за пиење и одведување на урбани отпадни води, фекалната канализација е наменета исклучиво за одведување на урбани отпадни води, а не и на атмосферски води од олуци, кровови и дворови.
– Дел од граѓаните се уште се соочуваат со сериозен проблем при обилни врнежи, кога преку фекалната канализација доаѓа до излевање на атмосферска вода во нивните домови, подруми и дворови. Главната причина за ова е погрешното приклучување на олуците, кровните површини и дворовите во системот на фекална канализација од градската мрежа. Направени се анализи и утврдено е дека атмосферските води значително го оптоваруваат системот кој е проектиран исклучиво за прифаќање на фекални отпадни води- се вели во известувањето од Општина Гевгелија.
Во наредниот период, надлежните служби ќе ги посетуваат домаќинствата и ќе ги задолжуваат сопствениците да ги отстранат неправилните приклучоци. Од Општината најавуваат дека вработените на терен ќе ги информираат граѓаните за законските обврски и ќе им укажуваат на правилниот начин на приклучување, со цел трајно решавање на проблемот.
