Последниот случај со угинувањето на берберските овци и мајмунот во скопската Зоолошка градина ја прели чашата кај јавноста па се бараше итна оставка од директорот што го постави градоначалничката Арсовска. Денеска од Зоолошката градина пратија соопшение до медиумите во кое демантираат дека ЗОО-Скопје се претворила во куќата на стравот…
Зоолошката градина во Скопје демантира дека се угинати над 40 животни. Во моментов имаме 646 животни од 91 вид, за кои се грижат зоонегуватели кои професионално си ја работат својата работа и се грижат за животните. Вкупниот број на родени животни за овие три години е 73, додека пак на угинати е 25.
Повеќето од угинатите животни се единки кои биле во длабока старост. Со оваа официјална бројка сакаме да ставиме крај на дезинформациите за угинати над 40 животни кои се пласираат во јавноста, истакнуваат од ЗОО-Скопје. Писмениот допис до медиумите, како што велат, го праќаат со цел и надеж дека одредени поединци ќе престанат со ширење дезинформации и невистини и со пласирање на информации со цел да ја вознемират јавноста.
