Здружението на новинарите на Македонија (ЗНМ) ги осудува заканите и говорот на омраза упатени кон уредникот на Алфа ТВ, Коле Чашуле, објавени од неколку корисници на социјалните мрежи.
Загрижува фактот што овие напади произлегуваат од монтирано видео со јасна намера за дискредитација на новинарот и поттикнување негативни реакции кон него.
Ваквите постапки претставуваат загрозување на слободата на медиумите и безбедноста на новинарите – принципи кои се важни за едно демократско општество. ЗНМ ваквото однесување го смета за неприфатливо и повикува надлежните институции да преземат соодветни чекори за идентификација и санкционирање на сторителите.
ЗНМ ќе го пријави случајот до Министерството за внатрешни работи (МВР) и ќе инсистира на темелна истрага за утврдување на одговорноста. Апелираме до јавноста да не подлегнува на дезинформации и говор на омраза, а до институциите – да обезбедат постојана и ефикасна заштита на медиумските работници.
