Заедницата на единиците на локалната самоуправа (ЗЕЛС) денеска во Скопје ќе биде домаќин на 26. состанок на Заедничкиот консултативен комитет меѓу Македонија и Комитетот на регионите на Европската Унија, на кој ќе се разговара за улогата на локалната власт во процесот на пристапување на земјава во ЕУ и за јавните набавки.
Како што стои во соопштението на ЗЕЛС, Заедничкиот консултативен комитет го сочинуваат 22 делегати, од кои по 11 од двете страни, избрани од редовите на градоначалниците и советниците, како и нивни заменици.
На првата сесија, посветена на процесот на пристапување на Северна Македонија во ЕУ, предвидени се обраќања на претседателот на ЗЕЛС, министерот за локална самоуправа и претставник на Делегацијата на ЕУ во земјава. Онлајн ќе се обрати и генералниот секретар на Конгресот на локалните и регионалните власти при Советот на Европа, Матје Мори.
За Локалната опсерваторија за спроведување на реформските агенди во Западен Балкан ќе говори Беса Речи, виш проектен службеник во Канцеларијата на Конгресот на Советот на Европа во Скопје. Втората сесија ќе биде посветена на јавните набавки, со излагања на домашни и странски експерти.
Изјави за медиумите се најавени за 11 часот, од претседателот на ЗЕЛС и копретседавач на Комитетот, Орце Ѓорѓиевски, заменик-министерот за локална самоуправа, Ерџан Селими, и копретседавачот од Комитетот на регионите на ЕУ, Иван Гулам, градоначалник на Општина Пировац во Хрватска.
Заедничкиот консултативен комитет е воспоставен во 2008 година со цел да го унапредува политичкиот дијалог и соработката меѓу локалните и регионалните власти на Македонија и земјите членки на ЕУ, во контекст на европската интеграција. Неговата работа е насочена и кон размена на искуства за обврските што произлегуваат од членството во ЕУ, како и промовирање на напредокот на земјата во децентрализацијата и локалниот развој пред европските институции.
Комитетот одржува две седници годишно, една во Македонија и една во Брисел, а со него раководат двајца копретседавачи, по еден од двете страни.
