Конечно на матурантите им се кратат маките. Денеска завршува полагањето на екстерните предмети на државната матура. Според првите проценки на Државниот иситен центар полагањата се одвивале во најдобар можен ред и без никакви нерегуларности. Препишувања и ученици со телефони сепак имало.
„Некаде околу 30 ученици беа откриени со телефони, истите им беа одземени и за тие ученици испитот е завршен. И се да напишале нивниот испит ќе биде поништен така што ќе треба да полагаат во августовската сесија.“- вели директорката на Државниот испитен центар, Даниела Јовчевска Михајловска.
Од Испитниот центар велат дека се уште е рано за резултати и анализи на нивото на знаење. Истите се очекува да бидат достапни за еден месец од сега.
„За нивото на знаење не можеме да дадеме анализи додека не ги добиеме резултатите од страна на нашите оценувачи кои што ќе работат во периодот што следи на оценување на тестовите. Кога ќе ги оценат тогаш ќе се пристапи кон анализа на податоците и ДИЦ некаде до крајот на годината ќе излезе со комплетен извештај.“ – вели Јовчевска Михајловска.
Доколку има ученици кои не се задоволни од резултатите, мислат дека се оштетени или заслужуваат поголема оцена од онаа што ја добиле можат да поднесат приговор преку нивното средно училиште. По поднесувањето на приговорот, се формира комисија што го разгледува секој тест посебно и носи одлука според истиот.
