Со засилено темпо продолжува реализацијата на проектите финансирани со средства од унгарскиот кредит. Според последниот пресек на Министерството за локална самоуправа, досега се склучени договори за 550 проекти од вкупно 828 проекти, колку што општините добија во вториот владин повик. На располагање се над 225 милиони евра. Добар дел од средствата се наменети за подобрување на патната инфраструктура низ општините.
„Од првиот јавен повик, повеќе од 48% се реализирани од оние 288 кои беа контрактирани со договори, а во вториот јавен повик повеќе од 550 проекти се со веќе склучен договор, што значи дека веќе се изведуваат на терен. Ова значи дека динамиката е многу соодветна и градоначалниците навистина го дадоа својот максимум во делот на нивните обврски што произлегуваат и од првиот, но и од вториот јавен повик. Ние сме задоволни како во иднина ќе се имплементираат овие средства“, изјави министерот за локална самоуправа, Златко Перински.
Перински, заедно со градоначалникот на Штип, изврши увид во изградбата на еден од трите паркови што се градат со европски пари. Со проектот „Трансформирање на урбани локации во зелена инфраструктура“, во рамки на ИПА-програмата за прекугранична соработка, преку Источнопланскиот регион се обезбедени 280.000 евра.
„Не е само овој парк. Во моментот се работи на уште три позиции, се создава нова зелена површина. Се поставува урбана опрема, со што на граѓаните на Штип им се овозможуваат удобни катчиња за релаксација и рекреација“, изјави градоначалникот на Штип, Иван Јорданов.
Перински посочи дека во изминатите седумнаесет месеци, во општините низ државата, покрај средствата од унгарскиот кредит во висина од околу 20 милијарди денари, преку различни програми дополнително се дисперзирани над 160 милиони денари, со кои се реализираат уште стотина проекти.
