Механизацијата е активна на терен и во тек е чистење на коритото на Отовичка Река, како дел од континуираните заложби за подобрување на животната средина и ревитализација на езерото „Младост“. Како што информираат од Општина Велес, ќе бидат исчистени околу 800 метри од речното корито, во продолжение на делот кој беше опфатен со претходните активности, со што ќе се подобри пропусната способност на реката и ќе се намали наносот што завршува во езерото.
Средствата се обезбедени од Општина Велес и Министерството за локална самоуправа – Биро за регионален развој, а проектот се реализира преку Центарот за развој на Вардарскиот плански регион.
Граѓаните на Велес и околните населени места ја поддржуваат акцијата за чистење на Отовичка река, но бараат освен крајбрежјето целосно да се исчисти и коритото на езерото „Младост“, полно со изумрени алги и фекалии кои се таложат на дното на езерото што го утврдија и стручњаците од надлежните институции.
Воедно велешани бараат што поитно и веднаш да се ископаат ветените бунари за вода со која езерото ќе се полни со свежа вода.
Граѓаните и екологистите велат дека сметаат оти за жал сите овие активности за чистење ќе бидат залудни ако не се спречи понатамошното загадување на езерото со фекалии од околната новоникната населба кои без никакво пречистување се слеваат дирекно во водите на езерото и секојдневно го загадуваат.
Инаку на брегот на езерото „Младост“ веќе трето лето стои таблата „Забрането капење“. На ваквата забрана најмногу реагираат велешани кои секое лето израснале на велешко езеро „Младост“ пливајќи во претходно чистите и бистри води на езерото, кои последниве години се загадени и забранети за капење.
