Почетокот на март нема да значи и старт на казнувањето за пушење цигари пред училишта, јавни установи, во угостителски објекти, или на автобуска постојка. Ќе се почне со информирање и едукација, а казнувањето доаѓа на крај. Од Министерството за здравство велат дека целта не целосно е да се забрани пушењето, туку да се заштити здравјето на граѓаните.
„Еве законот го има, но еве ќе ви дадеме простор во кој што ќе ве информираме дека работите незаконски и ќе се нотира која институција работи. Тоа не може безкрајно да се дозволи, но еве мислам дека е добра практика државата заедно со бизнис заедницата бидејќи тука се работи за сензитивен екосистем кај што имаме мали претпријатија која што нудат услуги пример ресторани, кафичи и така натаму, имаме производство на тутун, така да сакаме еве во првиот период да излеземее во пресрет и да ги информираме дека чекорите кој што ги имаат или треба да ги менуваат на производство и на услуги или треба да бидат казнети.“- вели министерот за здравство. Азир Алиу.
Министерот за здравство инсистира дека пред да стапи на сила законот за заштита од пушење, најпрво треба да се обезбедат доволен број на инспектори кои ќе проверуваат дали законот навистина се спроведува. Како што вели Алиу намерата е да не се повтори практиката од 2010 година кога истиот закон беше на сила, а сепак никој не го почитуваше.
„Ако ние почнуваме со казни ќе ни се случи дека заради капацитетите на луѓето што ги имаме а тие се лимитирани, нема да имаат време да одат од една во друга институција. И за жал ние имавме такво сценарио каде што не се пушеше во Скопје ама се пушеше на 20 или 15 километри надвор од Скопје, навистина не сакам да се доведеме до таква ситуација.“- вели Алиу.
Според новиот преглог закон се планира забрана не само на класичните туку и на електронските цигари, “вејп” апаратите и други уреди кои содржат никотин во сите угостителски објекти, фирми, јавни институции, автобуски и железнички станици, пазари и јавни места каде има повеќе луѓе. Не смеат да се пушат цигари ниту во автомобил ако има малолетно дете.
Според предложеното во законот, во рестораните и кафулињата ќе биде дозволено пушење само на терасите ако се отворени од најмалку 3 страни, а не како досега застаклени или преградени со фолии. Казните за непочитување ќе се движат од две до пет илјади евра.
