Tоа што Aртан Груби го кажа зоран Заев се обиде да го реватилизира, субвенции за вработување Албанци во приватниот сектор ќе има, ама не само за нив туку и за другите етнички заедници. Заев најави дека мерката ќе се спроведувала по региони. Во меѓувреме не стивнуваат реакциите на критики во јавноста зошто власта се меша во приватниот бизнис.
Големо „не“ за вработување по етничка и национална основа, едногласно реагираат граѓаните по изјавите на власта дека ќе дава државни пари за фирми кои ќе вработуваат Албанци. Јавноста ја осуди изјавата на Артан Груби кој отворено ги уценува компаниите.
- Само квалитет и ништо друго. Ова што ни се случува е лошо. Мислам дека изјавите на власта воопшто не се издржани. Етничката припадност не може да игра улога за вработување, мислам дека мора да има професионалност и квалитет. Тоа што власта сака да го протне на мала врата воопшто нее фер, реагираат граѓаните пред камерата на Алфа.
Реагираат и стопанствениците. Предупредуваат дека за бизнисот е важно да се решат економските проблеми, а не да се форсираат мерки за вработување по етничка основа. Ја критикуваат изјавата на Груби како неиздржана:
- Бизнисот мора да вработува луѓе со луѓе со квалитет, професионални, и со добри квалификации. Изјавата на вицепремиерот Артан Груби сметам дека дополнително е нарушување на законски одредби, зашто нашето општество се темели на граѓански концепт, вели за Алфа Миле Бошков од Организацијата на работодавачи на Македонија.
Од бизнис заедницата алармираат дека владата мора итно да донесе ефикасни мерки за да му се помогне на стопанство, во спротивно голем број на граѓани ќе останат на улица.
Премиерот Заев најави дека ќе се субвенционираат вработувања во приватни компании без оглед на етничката припадност. Владата ќе дава подршка при отворањето на фабрики а ќе се применува и Законот за стратешки инвестиции.
- Субвенции ќе има за сите етнички заедници, за сите иницијативи, ќе продолжи регионалниот пристап, ќе гледаме низ регионите и низ потребата од квалификувана работна сила, но и на мотивацијата на граѓаните да се квалификуваат за потребите на пазарот на трудот, изјави Заев.
Бурни реакции ги преплавија и социјалните мрежи. Сите коментари се насочени кон власта со критики дека е недозволиво да се меша во приватен бизнис. Според последните податоци од Агенцијата за вработување, од јануари бројот на невработени се зголемил за повеќе од 40.000 граѓани кои останале на улица.
Борис Грујоски
