Поради се позаострената ситуација во Лос Анџелес, безбедносните власти издадоа наредба за забрана за собирање во центарот на градот. Центарот на Лос Анџелес мора веднаш да се расчисти, објави полицијата на платформата X. Соопштено е и дека на маргините на протестите во метрополата за време на викендот биле уапсени 56 лица. Шефот на полицијата Џим Мекдонел изјави: „Бројот на апсења досега не е ништо во споредба со она што допрва доаѓа“.
Администрацијата на претседателот Доналд Трамп испрати 2.000 припадници на Националната гарда во Лос Анџелес, по два дена изолирани судири меѓу федерални имиграциски агенти и демонстранти. Според федерални функционери, гардата ќе помага во операциите поврзани со засилените мерки на Трамп против илегалната имиграција. Гувернерот на Калифорнија, Гевин Њусом, ја обвинува администрацијата на Трамп за намерно провоцирање ескалација и кршење на важечките закони со цел да се прикаже како решителен претседател. Доналд Трамп предупреди дека нема да толерира да се плука кон американските војници.
Денеска стапи во сила забраната за влез во САД на државјани од 12 земји што ја воведе американскиот претседател Доналд Трамп, соопшти Белата куќа.
Трамп ја најави забраната во средата, велејќи дека „мора да дејствува за да ја заштити националната безбедност и националниот интерес на Соединетите Држави и нејзиниот народ“.
Забраната целосно го ограничува влезот на државјани од Авганистан, Бурма, Чад, Република Конго, Екваторијална Гвинеја, Еритреја, Хаити, Иран, Либија, Сомалија, Судан и Јемен.
Патниците од Бурунди, Куба, Лаос, Сиера Леоне, Того, Туркменистан и Венецуела ќе бидат делумно ограничени, се додава во прогласот на Трамп.
Од Белата куќа велат дека некои од наведените земји имале „несоодветни процеси на скрининг и проверка, попречувајќи ја способноста на Америка да ги идентификува потенцијалните безбедносни закани пред влезот“.
