За помалку од еден час ќе се вози од Скопје до Приштина, но кога? Владата прво најави дека целиот автопат од 12.5 километри ќе биде завршен до 2023 година, краен рок кој како предолг беше критикуван од бизнисмените. Сега, пак, надлежните најавуваат дека е можно и тој да биде пробиен. Голем труд и напор е вложен од сите институции за препроектирање на патот Скопје-Блаце. Ова е одговорот на надлежните на бројните критики дека кратката делница предолго ќе се гради.
„Неблагодарно е да се каже точно кога ќе биде. Тоа што за мене, имајќи го в предвид искуството во овие 20 години е дека процесот го ставивме во иреверзибилна фаза„ – вели вицепремиерот за европски прашања Бујар Османи.
„ Овие проекти се од пред 20 години, влегуваат во индустриската зона Визбегово, влегуваат во гробиштата во Бутел, така да, тоа не е едноставно. Проект за изградба на автопатишта не е ни најмалку лесна работа. Напротив, сака голем труд“ – рече Горан Сугарески, министер за транспорт.
Првата фаза од два километри од границата до селото Блаце која треба да биде завршена за 18 месеци ќе чини 12.2 милиони евра, а тендерот го доби Гранит. Градежните работи требаше да почнат минатата пролет, но доцнат една година. Дотогаш треба да се завршат 68 експропријации на земјишта. Во Владата се оптимисти дека овој процес ќе биде завршен навреме, но не го откриваат буџетот кој ќе биде потрошен за оваа намена. Највисоката цена ќе изнесувала 50 евра за метар квадратен.
– Бирото за судски вештачења веќе направи проценка на вредноста на парцелите и очекувам до подобрувањето на временската ситуација да се најде решение и да заврши процесот на експропријација. Во секој случај станува збор за проект од државен интерес поради што не може да се стопира градбата, единствено сопствениците на парцелите може да ја обжалат понудената цена во суд, но тоа не не спречува да продолжиме со градбата, рече вицепремиерот за европски прашања Бујар Османи.
Автопатот Скопје-Блаце ќе чини меѓу 110 и 120 милиони евра. Првата фаза е целосно финансирана од ЈПДР во вредност од над 12 милиони евра. За втората фаза пари ќе се обезбедат преку заем од ЕБОР и грант од ИФЗБ.
Тања Попова
