Српскиот претседател Александар Вучиќ изјави дека нема да се сретне со делегацијата на Европскиот парламент која најави посета на Белград, оценувајќи дека „доаѓа непоканета“ и дека нема причина да „губи време“ со европратеници кои, според него, ја мразат Србија.
Делегацијата на Европскиот парламент треба да биде во Белград од 22 до 24 јануари. И претседателката на српскиот парламент, Ана Брнабиќ, порача дека ниту таа нема да се сретне со европратениците, наведувајќи дека посетата е без покана и дека во тие денови ќе биде во Естонија.
Одбивањето на средби со европратеници се случува по период во кој Европскиот парламент ја заостри реториката кон Белград.
