Сите земји-членки на Европската Унија на вонредниот Самит кој се одржа синоќа во Брисел ја повторија својата поддршка за Украина, освен Унгарија. Со ваквиот потег предлозите не станаа официјален заклучок, туку документ на ЕУ силно поддржан од 26-те земји-членки на Унијата.
„Сите ние сакаме мир, праведен и траен мир, но од позиција на сила. Ова е во интерес на претседателот Трамп. Ако сака да го постигне ова, тоа е можно само со поддршка на ЕУ и нејзините земји-членки, бидејќи треба да се исполнат предуслови. Го обезбедивме економскиот опстанок на Украина за 2025 година. Ова е во интерес на сите“ вели Урсула фон дер Лајен, претседателка на Европската комисија
Унгарскиот премиер Виктор Орбан, вели дека за Унгарија трошоците за Украина се превисоки.
„Треба да потрошиме повеќе пари за да ги зајакнеме нашите сопствени воени и одбранбени капацитети. Но, во исто време, некој треба да ја финансира украинската армија, што е огромна сума пари, а Американците не би биле дел од тоа во иднина. И мислам дека овие три работи заедно- три пакети, се едноставно премногу. Европа не може да си го дозволи тоа. Унгарија дефинитивно не“ вели Виктор Орбан, премиер на Унгарија
Претседателот на Украина, Володомир Зеленски, потврди дека следната недела во вторник, ќе отпатува за Саудиска Арабија, но потенцираше дека нема лично да учествува на преговорите, дека таа задача ќе ја преземат дипломати. Делегациите на САД и Украина ќе се сретнат за да разговараат за она што Вашингтон го нарекува „првичен прекин на огнот со Русија“.
Давид Крстевски
