Со полагање свежо цвеќе пред Споменикот на револуцијата во Струмица денеска беше одбележана 85. годишнината од Денот на востанието и Денот на борецот.
За значењето на празникот говореше градоначалникот, Петар Јанков.
-Кога зборуваме за овој ден, најчесто зборуваме за почетокот на борбата, за храброста на борците, за историските одлуки и за стремежот на еден народ да живее слободно. Зад секој историски настан стојат луѓе кои имале свои семејства, свои домови, свои планови и соништа. Луѓе кои знаеле дека со одлуката да се приклучат на борбата можеби се откажуваат од мирниот живот што го имале, а можеби и од можноста повторно да се вратат кај своите најблиски. Затоа, кога денес им оддаваме почит, треба да ги паметиме како синови и ќерки, родители, браќа и сестри, како наши предци кои во едно тешко време имале храброст да застанат зад идејата за слобода, рече Јанков.
Пред споменикот и во чест на сите кои ги положиле своите животи во Народноослободителната и антифашистичка војна, свежо цвеќе положија претставници на локалната самоуправа, Сојузот на борците, политички партии, институции и здруженија на граѓани, а членови на рецитаторската секција при Домот за деца и млади „Благој Мучето“ рецитираа револуционерна поезија.
