Во Делчево со свечена академија синоќа започнаа тридневните настани по повод одбележување на делото на светите браќа Кирил и Методиј, при што беше упатен и јавен повик за доизградба на соборната црква во градот.
Градоначалникот Иван Гоцевски во своето обраќање истакна дека обврска на сите граѓани е да придонесат за завршување на храмот, кој, како што нагласи, ќе претставува духовен центар, место на молитва и траен симбол на почитта кон светителите.
Тој ја актуелизираше донаторската акција и ги повика граѓаните, општествено одговорните компании, иселениците и сите почитувачи на делото на Кирил и Методиј да донираат средства согласно своите можности.
Настанот го отвори претседателот на Советот, Николчо Стојменовски, кој ја потенцираше важноста од зачувување и негување на македонскиот јазик и духовното наследство на солунските браќа. Тој истакна дека современите генерации имаат света должност да ја продолжат нивната мисија и да останат доследни на вредностите што тие ги поставиле.
На присутните им се обрати и епископот Марко, кој зборуваше за значењето на кирилометодиевската традиција и потребата од нејзино почитување и пренесување на идните генерации.
Чествувањето продолжи со промоција на книгата „Св. Кирил и Методиј“, со промотор монахиња Ирина, како и со концерт на црковно византиско пеење во изведба на хорот „Света Злата Мегленска“ од Скопје.
Во текот на денешниот ден предвидена е црковна литургија во храмот Св. Кирил и Методиј како и литија до параклисот Св.Климент Охридски.
