Со полагање цвеќе пред споменикот на Гоце Делчев и пред споменикот на паднатите борци од Народноослободителната војна во центарот на Делчево, денеска беше одбележан 2 Август – Илинден, Денот на Републиката.
На спомен-плочата со имињата на загинатите борци стои пораката „Сонцељубиви, зар без вас ќе бевме ова што сме“, како потсетник на нивната жртва и придонес во борбата за слобода.
Во рамки на одбележувањето, членови на КУД „Гоце Делчев“ од Делчево читаа реферат за значењето на празникот, потенцирајќи ја историската важност на Илинден како симбол на македонската борба за слобода и државност.
По повод празникот, градоначалникот на Општина Делчево, Иван Гоцевски, упати честитка до граѓаните, истакнувајќи дека овој датум засекогаш е врежан во историјата на Македонија како симбол на слободата, достоинството и стремежот кон сопствена држава.
-Илинденското востание од 1903 година и Првото заседание на АСНОМ во 1944 година се темелите врз кои е изградена современата македонска државност. Тие претставуваат историски пресвртници што го трасираа патот кон независна и суверена Република Македонија, остварена на 8 Септември 1991 година- се наведува во честитката.
Гоцевски нагласува дека обврска на сегашните генерации е да го чуваат споменот и делото на илинденците и на сите кои се бореле за слободна и достоинствена татковина.
-Нивната жртва нè обврзува да продолжиме да градиме силна, просперитетна и европска Македонија, заснована на единство, развој и еднакви можности за сите- додава тој.
По повод празникот, градоначалникот им упати честитки и на сите граѓани кои го носат името Илија, посакувајќи им здравје, среќа и успех.
-Нека е честит и вечен 2 Август – Илинден! Нека е вечна Република Македонија-, се вели во честитката на Гоцевски.
Свеченостите за Илинден продолжуваат со културно – уметничка програма кај манастирот Св Илија во село Ѕвегор.
