Денеска во Босилово по 5. пат се одржа локалната традиционална манифестација „Ајвeријада 2026“, на која на повеќе печки се подготвуваше традиционалниот ајвар.
Според организаторите, манифестацијата има за цел да ги промовира сите специјалитети од црвена пиперка, но и да ја промовира традицијата на поддготвување на ајвар во домашни услови.
-Оваа манифестација се одржува веќе петта година по ред и постепено станува една традиција со која се гордееме сите во Општина Босилово.Секоја манифестација е важна и убава на свој начин, но една од најтешките манифестации за организација е токму оваа „Ајверијада“, затоа што денеска ќе бидат подготвени околу 400 килограми ајвер и верувајте тоа воопшто не е мала работа и затоа сакам да им се заблагодарам на сите домаќинки кои овие денови се вклучени во реализацијата на оваа манифестација, рече градоначалникот на Босилово, Ристо Манчев.
Подготвениот ајвар се дегустираше со домашно сирење на спортското игралиште на училиштето „Гоце Делчев“, а покрај него од штандовите можеше да се вкуси и лутеница, малиџано и други специјалитети подготвени од црвени пиперки, како и домашни чварки, а на штандовите беа изложени и грнчарски производи и природен пчелен мед и пчелни производи.
Во рамките на манифестацијата се одржа богата културно уметничка програма со настап на познати пејачи и културно уметнички друштва.
Манифестацијата се одржа под покровителство на Општина Босилово и Министерството за земјоделство, шумарство и водостопанство.
