Во Белград приведен Саит Саитов, осомничен за прегазување жена во Скопје
Министерството за внатрешни работи соопшти дека во Белград е приведен Саит Саитов, осомничениот за случајот во скопски „Капиштец“, каде прегази жена и избега од државата. Од МВР велат дека вчера надлежните служби во Србија биле известени дека Саитов бил лишен од слобода во Белград.
Против него беше распишана меѓународна потерница од македонското МВР под сомнение за извршени тешки кривични дела против безбедноста на луѓето и имотот во сообраќајот и за неукажување помош на лице повредено во сообраќајна незгода.
За настанот што се случи во Скопје на 9 јануари на Саитов му е одреден екстрадициски притвор. Следува постапка помеѓу министерствата за правда на двете држави со цел негово екстрадирање во Македонија и изведување пред лицето на правдата, информираа од МВР.
