ВМРО-ДПМНЕ најостро го осудува палењето на куќата на директорот на Управата за извршување санкции, Александар Пандов, и повикува на итна и брза реакција од страна на надлежните институции. Во соопштението на партијата се истакнува дека овој чин претставува обид за заплашување и замолчување на Пандов, кој изминатиот период јавно зборувал за криминалните дејствија кои се случувале, а кои тогашната власт и раководство се обиделе да ги прикријат.
Како што се наведува во соопштението, Пандов е цел на напад затоа што се спротивставил на криминалот и корупцијата, и се ставил на страната на правдата. ВМРО-ДПМНЕ истакнува дека криминалците повеќе не ќе имаат заштита од власта, а за ваквото девијантно однесување ќе има казни.
„Времето на палење куќи, автомобили, уцени и закани заврши. За секој одговорен и инволвиран во вакви настани ќе следува одговорност. Правда мора да има“, се посочува во соопштението на владејачката партија.
