ВМРО-ДПМНЕ, како предводник на институциите, за помалку од една година покажа значителни резултати во интерес на граѓаните. Партијата ја презема одговорноста за управување со Владата во услови на економска и институционална криза, оставена од претходното владино раководство, при што беше забележан значителен пад во сите области.
Во соопштението, ВМРО-ДПМНЕ истакнува дека следела интензивна и макотрпна работа за спречување на економскиот пад и започнување на процесот на економско заживување. Според партијата, платите и пензиите се зголемени, а странските директни инвестиции достигнаа историски највисоко ниво, надминувајќи една милијарда евра.
„Постепено се враќа функционирањето на институциите, се води решителна борба против криминалот и корупцијата, а апсењата на лица кои беа недопирливи покажуваат дека законот важи еднакво за сите“, се наведува во соопштението.
Граѓаните го препознаваат напредокот, ценат досегашните политики на Владата и ги поддржуваат мерките кои водат кон функционални институции и ефикасна борба против организираниот криминал и корупцијата. Поради тоа, ВМРО-ДПМНЕ истакнува дека анкетите потврдуваат висока доверба во владината работа и во претседателот и премиер, Христијан Мицкоски.
Истражувањата на јавното мислење покажуваат дека над 60% од граѓаните ја поддржуваат владината борба против организираниот криминал, додека две третини од испитаниците ја поддржуваат владината мерка за замрзнување на маржите на дел од производите. Доколку утре се одржат избори, 51,7% од испитаниците би гласале за ВМРО-ДПМНЕ, додека довербата во Христијан Мицкоски изнесува 25,4%.
„Резултатите од ова истражување се доказ за досегашната работа, но и обврска за ВМРО-ДПМНЕ да продолжи со својата посветеност на подобрување на животот на сите граѓани“, потенцираат од партијата.
