ВМРО-ДПМНЕ бара од СДСМ да се огради од поранешниот министер за земјоделство Трајан Димковски. Според партијата, наместо да ги брани криминалците во своите редови, СДСМ треба да го осуди потегот со кој се оштетил државниот буџет за 800 илјади евра преку отпис на 2.000 тони јачмен и пченица. Од ВМРО-ДПМНЕ велат дека за Зоран Заев, Венко Филипче и Љупчо Николовски, приватниот интерес секогаш бил пред државниот, дури и во услови на глобална криза. Андоновска јавно праша дали отпишаните производи од стоковите резерви завршиле на црниот пазар.
„Јавноста мора да знае, дали отпишале 2.000 тони јачмен и пченица од стоковите резерви, па преку Димковски овие продукти завршувале на црн пазар во соседна држава? Дали исто така, Димковски ќе одговара за сите овие тројца кои се прв ешалон на тогашната власт? Затоа ли Николовски е толку гласен деновиве? Дали во СДС има страв дека се одмотува клопчето и ќе се дознае вистината?“, изјави Андоновска.
Претседателот на СДСМ, Венко Филипче пак денеска не зборуваше за злоупотребите во земјоделскиот сектор кои фрлија сенка врз раководството на партијата, туку го критикуваше зголемувањето на пензиите и поскапувањето на струјата. Тој рече дека владата со линеарното зголемување на примањата на највозрасната категорија граѓани, оштетила над 90% од пензионерите. Доколку било задржано старото законско решение кое го следеше СДСМ кога партијата беше на власт, партијата пресметала дека покачувањето би било од 1200 до 1500 денари.
Премиерот Мицкоски во повеќе наврати потенцираше дека порастот на пензиите од вкупно 6.000 денари во последнава година и пол се направил за да се подобри стандардот на оние со најниски примања. Уставниот суд треба да одлучи дали ќе го укине последното линеарно покачување, откако поведе постапка за уставноста на одлуката. Незадоволни од ваквиот развој на настаните, пензионерите од цела држава во понеделник ќе излезат на протест пред Уставниот суд. Најниската пензија во моментов изнесува над 18.000 денари, просечната надминува 26.000, а има и такви чии примања надминуваат 80.000 денари.
