Забрзување на економските активности и раст од 3.7% во 2025-та. Ова се проекциите на Владата охраврена од најновите бројки кои покажаа дека 2024-та завршила со 2.8% зголемување на БДП, а најдобар резултат имало во четвртиот квартал, 3.2%.
„Овие бројки ги одразуваат стабилните економски перформанси, поттикнати од стратешките политики, подобрените деловни услови и континуираните инвестиции во клучните сектори “, рече Марија Митева, портпаролка на Владата.
Главен поттик за целата економија лани било градежништвото кое пораснало за 13.2%, а позитивни ефекти имале и инвестициите во стручните, научни и технички дејности. Од 10.2%.
„Повеќе јавни и приватни инвестиции, придонесуваат за зголемена активност во градежниот сектор, кој стана водечка индустрија за раст на БДП. Зголемен е порастот и во стручни, научни и технички дејности, овој сектор пак се покажа како еден од клучните двигатели на економијата, во контекст на зголеменото внимание на иновациите, технолошкиот напредок и дигитализацијата, што директно влијае на продуктивноста и конкурентноста на македонската економија каде има пораст од 10,6 отсто“, изјави Марија Митева, портпаролка на Владата.
Надлежните очекуваат растот годинава да се темели на повеќе основи – инвестициите во инфраструктурата преку изградбата на патишта и пруги, но и преку локалните проекти кои се финансиираат од унгарскиот кредит; домашните компании кои добија финансиска инјекција преку другиот дел од оваа позајмица; како и странските директни инвестиции кои лани имаа рекордно ниво од 1 милијарда и 250 милиони евра, тренд кој се очекува да продолжи и годинава.
Љубиша Владимиров