Владата остро ја осудува неодговорната и неетичка постапка на одредени странски медиуми, кои, и покрај постојаните апели за почитување на етичките новинарски стандарди, денес ја преминаа секоја граница на хуманост и достоинство при известувањето за трагичниот погреб во Кочани, се наведува во соопштението од Владата.
„Во време кога интегритетот, точноста и одговорноста треба да бидат основни принципи во известувањето, сведоци сме на нивно игнорирање. Сензационализмот, како и стремежот кон фотографии и наслови кои привлекуваат внимание и вознемируваат, а ги ставаме пред вистината, ја деградираат суштината на новинарството. Ова е не само неприфатливо, туку и штетно за јавноста, а уште поважно за индивидуите и семејствата на жртвите на оваа трагедија. Искористувањето на моментите на жалост и тага заради сензационализам е недозволиво“, истакнуваат од Владата.
Тие апелираат до сите медиуми да се придржуваат до највисоките стандарди на професионално известување и да ја почитуваат личната болка и достоинството на семејствата на жртвите.
„Правото на информираност никогаш не смее да биде по цена на основната човечка пристојност. Очекуваме одговорно известување, кое ќе ги служи интересите на јавноста. Владата останува посветена на транспарентноста и слободата на медиумите, но нема да премолчиме на неетички практики кои ги нарушуваат принципите на чесност и почит. Ги повикуваме релевантните меѓународни медиумски тела да го забележат ова и да го спречат ова опасно движење, кое може дополнително да ја наруши довербата на јавноста“, се додава во соопштението на Владата.
