Заврши трпението на владата за самоволието на град Скопје и надлежното комунално претпријатие.. За „планините“ од отпад кој може да се види по улиците во Скопје, институциите добија итна наредба од владата, веднаш да излезат на терен и да проверат зошто македонската метропола е претворена во мега депонија. Владата го задолжи МВР, заедно со три инспекторати – комуналниот, за животна средина и санитарниот, и Институтот за јавно здравје, итно да почнат со координирани вонредни инспекции низ Скопје.
„Се задолжуваат Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје, во соработка со Министерството за внатрешни работи, согласно своите законски надлежности, веднаш да почнат со координиран вонреден инспекциски надзор на територија на Град Скопје, со цел утврдување на состојбата со комуналниот и друг вид на отпад и преземање соодветни мерки и активности.“- соопштува Владата.
На удар ќе бидат ЈП Комунална хигиена и Град Скопје. Министерството за внатрешни работи, според владината наредба, ќе го испитува работењето на јавното претпријатие, но и на градоначалничката Данела Арсовска.
„Состојбата е алармантна и иако надлежноста е на Град Скопје, поради континуираното непостапување ги повикуваме институциите веднаш да постапуваат по донесените заклучоци на Владата.“- велат во соопштението од Владата.
Непријатната миризба и валакните улици станаа секојдневие со кое граѓаните се будат последниве неколку дена. Со денови алармираат дека купови ѓубре се трупа во секоја општина во градот. Според Владата, оваа состојба веќе претставува закана за здравјето на граѓаните.
