Владата ја продолжи мерката за намален данок за горивата. Намалената даночна стапка, од 18 на 10% ддв за дизелот која стартуваше од 15 септември, ќе продолжи да важи и во наредните две недели. Од Владата велат дека во услови на раст на цените на нафтата на светските пазари, се преземаат мерки со цел да се ублажи ударот врз стопанството и новите цени да не предизвикаат сериозен удар по џебот на граѓаните.
„Продолжуваме со мерките за заштита на стандардот на граѓаните и стабилноста на домашната економија. Со продолжувањето на оваа мерка директно влијаеме врз малопродажните цени на горивата и го ограничуваме пренесувањето на надворешните ценовни притисоци врз цените на останатите производи и услуги“, објави министерката за финансии, Гордана Димитриеска Кочоска.
Ваквата мерка е добредојдена во услови кога се очекуваат новите цени кои треба да ги објави регулаторна. Најголемиот притисок повторно е кај дизелот, поради нарушеното снабдување од Блискиот Исток и Русија. Во моментов литар ЕУРОДИЗЕЛ се продава по цена од 104,5 денари. ЕУРОСУПЕР 95 е 99, а бензинот од 98 октани 101 денар.
Од Владата велат дека преземените мерки ги даваат посакуваните ефекти и дека само кај дизелот граѓаните дневно заштедуваат и до 250 илјади евра. Поради најевтините горива кои Македонија ги има во однос на земјите во регионот и понатаму е забележан зголемен промет на бензинските станици во близина на јужните, западните и северните гранични премини на државата. Во земјава дневно се трошат до два милиони литри горива, од кои околу 1,5 милиони литри се троши на дизелот. Дополнително, според владините пресметки, намалената акциза за четири денари кај дизелот и за два денари кај бензините, заедно со пониското ДДВ, досега овозможиле вкупна заштеда од околу 4,5 милиони евра.
