Платформа за јавно-приватен дијалог помеѓу Владата и приватниот сектор, организациска и техничка поддршка на извозните компании, специјализирано тело за извозни компании – бизнис заедницата во соработка со владата се мобилизира за поголема афирмација на домашните извозни компании и подобрување на нивните потенцијали. Во стопанската комора свечено беа отворени просториите на институтот за извоз и заседаваше националниот совет за извоз, како тело за јавно-приватен дијалог во доменот на креирањето политики за унапредување на овој план.
Покрај претседателот на комората Бранко Азески како прв човек на Советот за извоз, членуваат и претставници од приватниот сектор од различни дејности кои се извозно ориентирани, како и највисоките претставници од владата и владините институции, вклучително и шефот на Владата. Христијан Мицкоски порача дека преку силно партнерство на Владата и бизнисот македонската економија може да стане поконкурентна и дека новиот Институт за извоз е добра можност стопанските комори од регионот заедно да дискутираат за регионално поврзување, вмрежување и настап на нови пазари.
„Ценам дека како Влада секогаш сме биле, во овие месеци откако сме влада, а и претходно како опозиција, партнер на бизнисот. Така и ќе продолжиме да бидеме и во иднина, мислам дека бизнисот и Владата треба да се партнери и партнерски да соработуваат и да се надополнуваат. И тука нема ништо лошо, нити пак нешто чудно. Јас мислам дека само на тој начин можеме да бидеме и поконкурентни, добра е оваа можност што денеска најголемите регионални комори се тука, од регионот, заедно со нашата најголема комора, би рекол. На тој начин ќе можат заеднички да дискутираат за иднината и за сето она коешто претставува план, регионално поврзување, вмрежување и настап на нови пазари, бидејќи ценам дека, а и тоа го кажав, во моето обраќање на првиот настан дека, ценам дека полека но сигурно ќе треба заедно да се вмрежуваме и заедно да настапуваме во намерата да бараме нови пазари, рече премиерот.
Азески и Мицкоски лично се заложија за прашањето поврзано со извозот и генерална економска трансформација на земјава.
