Владата е подготвена да го прифати секое решение за зголемување на минимална плата кое ќе го договорат синдикатите и работодавачите. Тие треба да остварат средба до крајот на ноември на социјално економскиот совет, а дотогаш премиерот, објасни дека нема да има било каква интервенција, надвор од рамки на законот.
„Во ноември ќе имаме седница на социјалниот економски совет и очекувам ова прашање да се отвори таму. Ние како Влада ќе го прифатиме секое решение кое ќе го договорат работниците и работодавачите“, изјави премиерот Христијан Мицкоски.
За Владата секакво ад-хок решение без економска поткрепа и анализа само ќе направи директен притисок врз малите и средни претпријатија, кој потоа можат да предизвика бранови отпуштања.
Министерот за економија Дурмиши објасни дека во моментов не гледа логика за интервентно зголемување. Појасни дека Владата ќе изврши усогласување на минималецот со зголемувањето на инфлацијата и трошоците за живот, како што предвидува и законот.
„Ако одиме на ад хок зголемување на минималната плата тоа ќе предизвика уште понатаму зголемување на инфлацијата, за 18 месеци сме ги зголемиле платите во образование, кој е клучен столб во општеството, полицијата, здравството, зголемени се пензиите. Минималната плата според одредена и усогласената формула е зголемена во март годинава, каде што исто така во март наредната година исто ќе се зголеми“, изјави министерот за економија Бесар Дурмиши.
Во моментов минималецот во Македонија е 24,379 денари. Според досегашните параметри на инфлација и трошоци на живот, новото редовно зголемување би требало да биде околу две илјади денари а ќе се случи во март 2026 година. Синдикатите па негодуваат. Тие бараат 500 евра минимална плата без да се земат предвид статистичите податоци.