Судовите и Обвинителствата наредната година ќе добијат 0,35 % од бруто домашниот производ и ни денар повеќе, согласно новиот Закон за судскиот буџет којшто се подготвува во Министерството за правда. Премиерот МИцкоски е дециден и повторно нагласува дека нема каква било причина судиите и обвинителите да добијат поголем буџет. Македонија според него одвојува пари од буџетот за правосудниот систем повеќе од 75% земји членки на ЕУ, односно 0,3 % е всушност европски просек и нашата земја не отстапува од него.
Мицкоски појаснува дека немаме пари ниту потреба судиите и обвинителите да ги подмириме со 1,3% од БДП, односно 260 милиони долари, онолку колку што бараат, бидејќи ЕУ од нас бара да имаме и финансиска консолидација. Тој потсети дека судиите не се под плата од 100.000 денари месечно, а претседадателите на судовите имаат и до 3.000 евра плата. Согласно реформите тие ќе имаат свој буџет, но пред собраниска комисија ќе ги правдаат парите.
Шефот на владата вели дека е прв што доживеал здржен напад од судиите и обвинителите. Отфрла политичко влијание врз судството, но вели дека опозицијата и тоа како се меша и врши притисок. Премиерот прашува зошто опозицијата бара анкетни комисии за трагедијата во Пулс кога им верува на судиите и обвинителите. Според него, поединци од судството жилаво се борат за пари и да си ги задржат фотељите.
Државниот обвинител Коцевски од собраниска говорница се жалеше дека немаат пари ниту луѓе за да може да си ја вршат работата. Дури и судиите минатата недела го искараа премиерот дека ја преминал границата со изјавата дека со довербата на граѓаните од само 2 %, тие не заслужуваат поголем буџет и повисоки плати.