Републичкиот јавен обвинител да се бира со двотретинско наместо со просто мнозинство во Собранието, но и да нема право на реизбор по шестгодишниот мандат, што е случај во моментов. Ова се препораките кои до Македонија ги испрати Венецијанската Комисија и генералниот директорат за човекови права и владењее при Советот на Европа, за што според нив неопходна е исмена на македонскиот устав. Иако имаат недостатоци, тие како многу позитивни ги оценуваат предлог законите за Јавно обвинителство и Советот на јавни обвинители.
-Моментално, Мандатот на републичкиот јавен обвинител во земјава е шест години, со право на реизбор. За Советот на јавни обвинители пак, Венецијанската комисија препорачува допрецизирање на тоа кој може да биде член на советот, а бара и да се суспендира функцијата обвинител за време на вршење на мандатот во советот, се вели во препораката.
Претседателката Гордана Сиљановска Давкова изрази задоволство од ваквите оценки и препораки од Венецијанската комисија и кажа дека овие предлог закони треба да се донесат што побргу.
-Веднаш по завршувањето на локалните избори мора да стигнат законите во Собранието бидејќи не може да имаме реформи во судскиот систем без да имаме законски промени. И мислам дека тоа е еден добар потег, изјави Сиљановска Давкова.
Мислењето за овие закони е побарано од македонската влада со цел да се подобри судскиот интегритет преку ревидирање на процесите за избор, оценување, унапредување и разрешување на судии и обвинители. Сиљановска Давкова порача дека овој пример треба да се следи и во иднина, бидејќи иако советодавно тело, во Венецијанската комисија членуваат врвни правници.
Матеја Петровски
