Кампањата за локалните избори на интегративците е финансирана со испумпани пари од Исламската верска заедница. Ова го вели поранешниот муфтија Плуми Велиу, кој во емисија на Алфа телевизија обелодени дека на 26 септември годинава, еден милион евра од ИВЗ биле префрлени во странска земја, а потоа вратени назад и употребени за политички цели и кампања.
Велиу појаснува дека целото раководство на ИВЗ е инсталирано од страна на ДУИ. Поранешниот муфтија ја повикува Управата за финансиско разузнавање да ги провери овие наводи, бидејќи противзаконски е верски средства да се користат за политички активности. Според него, симптоматично е каде завршиле парите, особено затоа што овој период од годината не се организира аџилак.
За овие сериозни обвинувања, Алфа побара став од Исламската верска заедница. Оттаму ги негираат овие информации. Велат дека ИВЗ е сериозна организација, а за тврдењата на Велиу, ќе остават судот да цени.
Не се занимаваме со никакви коментари, особено за лица кои немаат никаква поврзаност со ИВЗ. ИВЗ е сериозна организација. Нашата држава има свои институции, затоа коментарот ќе го дадеме на суд, а судот ќе ја разјасни клеветата на лицата кои и за време на претходната влада ги правеа истите клевети, велат од ИВЗ.
Во јавноста и претходно се говореше за тесни врски меѓу Исламската верска заедница и ДУИ, особено во периоди на избори. ИВЗ често била предмет на критики за нетранспарентност во работењето и кадровски влијанија од политиката. Плуми Велиу, кој беше муфтија во Битола и порано јавно говореше за злоупотреби и корупција во рамките на институцијата, обвинувајќи дека со години се одвива политизација на верските структури.
Во истражување на „Институтот за политички истражувања – Скопје, 53,8% од испитаниците сметаат дека ДУИ има најголемо влијание врз ИВЗ, додека влијанието на останатите политички партии е речиси занемарливо.
