Утре започнува изборот на нов папа. Огромни се мерките за безбедност кои се преземаат во пресрет на конклавата, која ќе започне во 16:30 минути во Сикстинската капела.
Ватикан соопшти дека ќе го прекине сигналот за мобилните телефонски мрежи за време на конклавата, каде што ќе се избира новиот папа. Тоа, според соопштението од Ватикан, значи дека утре од 15 часот сите системи за пренос на телекомуникациски сигнали за мобилни телефони на територијата на државата Ватикан ќе бидат деактивирани. Деактивирањето на сигналот на мобилните телефони нема да ги опфати посетителите на плоштадот „Свети Петар“.
Сите 133 кардинали под 80 години, кои имаат право да учествуваат во изборот на нов папа, веќе се собрани во Ватикан пред почетокот на конклавата. Кардиналите ќе гласаат во тајност сè додека не се избере наследникот на починатиот папа Франциск. За да биде избран новиот поглавар на Римокатоличката црква, еден од кардиналите мора да добие двотретинско мнозинство.
