Лекарите денеска соопштија дека папата Франциско повеќе не е во непосредна опасност од воспаление на белите дробови, поради што е во болница речиси еден месец, но дека ќе остане во болница уште неколку дена за да ја прими терапијата.
Како што пренесува АП, лекарите додале дека состојбата на 88-годишниот папа е стабилна и дека во последните денови има консолидирано подобрување, што го потврдија тестовите на крвта и позитивната реакција на лекувањето.
Ватикан соопшти дека лекарите ја промениле својата претходна претпазлива прогноза, што значи дека неговиот живот повеќе не е во непосредна опасност по првичната респираторна инфекција со која беше примен во болница на 14 февруари.
Со оглед на сложената клиничка слика, сепак, ќе биде неопходно да се продолжи со медикаментозната терапија во болница уште неколку дена, се додава во соопштението на Ватикан.
Папата денеска преку видео конференција го проследи духовниот собир во Ватикан, кој се одржува секоја година пред Велигден и трае една недела, што е уште еден знак за неговото подобрено здравје.
Поглаварот на Римокатоличката црква, исто така, денеска продолжи да прима физикална и респираторна терапија во римската болница Ѓемели, додека се одмара и се моли.
