Како копретседавачи со Мешовитиот парламентарен комитет (МПК), европратеникот Карло Реслер и јас, со своите воведни излагања ја отворивме првата работна сесија на 24 состанок на МПК, што на 26 и 27 ноември 2025 година се одржува во Европскиот парламент во Стразбур, Франција, се наведува во денешните соопштенија на Центарот за комуникации на ВМРО-ДПМНЕ – објави на Иванка Василевска.
На состанокот учествуваа и министрите за надворешни работи и надворешна трговија, проф. д-р Тимчо Муцунски и за европски прашања, г-динот Орхан Муртезани.
Во моето воведно обраќање истакнав дека како држава целосно сме посветени на спроведувањето на Реформската агенда и на Планот за раст на Европската Унија. Во таа насока, најновиот Извештај за проширување на Европската комисија дава позитивен осврт на нашата ангажираност и на конкретните резултати постигнати во рамките на Планот за раст на Западен Балкан.
„Благодарение на позитивните оценки, ние бевме првата земја од Западен Балкан што доби претфинансирање во рамките на Програмата за реформи и раст на ЕУ, во износ од 52,4 милиони евра оваа пролет, а до ноември 2025 година, исто така обезбедивме две дополнителни исплати базирани на перформансите. Започнавме со работа на сите четири столба на Планот – поблизок пристап до единствениот пазар на ЕУ, посилна регионална интеграција, клучни реформи и зголемена финансиска поддршка. Истовремено, усвоивме Агенда за реформи, фокусирана на подобрување на управувањето и јавната администрација, унапредување на зелените и дигиталните транзиции, зајакнување на човечкиот капитал, подобрување на деловното опкружување и почитување на основните права и владеењето на правото“.
Нагласив дека Собранието во изминатиот период усвои клучни реформски закони, вклучувајќи го Законот за систем на внатрешна финансиска контрола во јавниот сектор, законите за административни службеници и за вработени во јавниот сектор, со кои се подобрува начинот на избор на државни службеници и управувањето со човечки ресурси.
Во рамките на вториот ден од дискусијата на 24. Состанок на Мешовитиот парламентарен комитет, дискутиравме на темите:
– Перспективата на пристапните преговори, добрососедските односи, регионалната стабилност и регионалната соработка;
– Прашања поврзани со животната средина;
– Транспорт, енергија и инфраструктурна поврзаност и
– Вештачка интелегенција и дигитализација.
На крај од дискусиите заедно со колегите од Европскиот парламент усвоивме заеднички Препораки кои ги опфаќаат аспектите на меѓусебните односи, а ќе бидат упатени до институциите на Европската унија и нашите институции.
