Превртени и искршени клупи и канти за отпад – ова е сликата во „Жена парк – Борец“, симболот на Скопје во центарот на градот откако беше мета на вандали.
Фотографиите кои Скопјани ги споделуваат на социјалните мрежи го прикажуваат просторот, кој наместо да служи за релаксација, претставува слика на неодговорност и вандализам во строгиот центар на Скопје.
Градоначалникот на Општина Центар, Горан Герасимовски бара неговата иницијатива за вршење општокорисна работа на малолетниците кои вандализираат во најкус можен рок да се преточи во закон, со цел да се намалат ваквите девијантни појави во општините.
„Очекувам во најбрз рок нашата иницијатива да се преточи во закон, барам поддршка од сите пратеници да ги поддржат новите законски измени за да може да го спречиме вандализмот во општините. Еве повторно, гледаме вандализам во центарот на градот, кај „Жена парк – Борец“ кадешто се скршени и откорнати клупи со расфрлан отпад. Ова мора да го стопираме“, вели Герасимовски.
Иницијативата на Општина Центар беше едногласно прифатена на последната седница на управниот одбор на ЗЕЛС и со неа се предвидува да се направат измени на постоечките законски решенија со кои освен малолетниците, и нивните родители ќе треба да вршат општокорисна работа доколку нивните деца се фатени како вандализираат.
