Уставниот суд на денешната седница ќе дискутира и одлучува по 11 иницијативи за оценување на уставност и законитост на акти, едно барање за заштита на слободи и права на граѓанин и усвојување една конечна одлука и девет нацрт-решенија.
На дневен ред се оспорените одредби од Законот за општата управна постапка, Законот за пензиското и инвалидското осигурување, Законот за судовите, Законот за судскиот буџет, Законот за облигационите односи, како и повеќе правилници и колективни договори.
Судот ќе расправа и за иницијативи што се однесуваат на Законот за железничкиот систем, Законот за јавната чистота, како и за одлуката за донесување детален урбанистички план во општина Охрид.
Пред уставните судии ќе се најде и предметот по барање за заштита на слободите и правата на граѓаните вбо согласност со член 110 алинеја 3 од Уставот, поднесен од политичката партија Левица, која наведува дискриминација по основ на политичка припадност.
Подносители на иницијативите се физички лица, адвокати, правни субјекти и политички партии.
