🎥 Уште се опасни пожарите во Црна Гора, но и во регионот

Со натчовечки напори, со механизација и гаснење од земја и водух пожарите во Црна Гора се ставени под контрола. Локализиран е пожарот што направи огнен прстен околу главниот град Подгорица што ги загрози куќите и имотите во околината на градот. Во моментов се активни неколку пожари во околината на Подгорица, а најкритично е на подрачјето на Кучи, каде што огнот се гасне со авион.

„Правиме се за да ги заштитиме како куќите, така и животите на луѓето кои ни се приоритет. За сега немаме потврда дека човечки живот е загрозен или не дај боже некој да настрадал. Имаме еден дел од куќа кој е зафатен, но преку 20 возила со целата единица мобилизирана се на лице место“, изјави Никола Бојановиќ – шеф на пожарникарите во Подгорица.

Комплицирана е ситуацијата и во Даниловград, додека пожарите во Никшиќ и Бијело Поље се активни, но под контрола. Сепак пожарникарите велат дека моменталната ситуација е многу подобра отколку што била изутрината и вчера. Утре е ден на жалост во Црна Гора откако во борбата со огнената стихија загина војник, додека неговиот колега беше тешко повреден. На црногорското приморје ситуацијата е стабилна, но сепак се уште гори во близина на Чањ.

Во гаснењето на пожарите, Црна Гора доби помош од Србија, како и од земјите членки на ЕУ и НАТО. Во последните два дена, покрај леталата на МВР и Армијата на Црна Гора, беа ангажирани хеликоптер од Србија, канадери од Хрватска и Италија, а најавена е и помош од Унгарија и Австрија. Во овие тешки моменти, пристигнуваат и емотивни сцени од Црна Гора – деца им се заблагодарија на пожарникарите со срца во рацете, а српски војник со дланките формираше срце за Црногорец кој го вееше српското знаме, испраќајќи порака за човечка солидарност.

Сепак, има и инциденти – на едно видео, повозрасен човек со камења во рацете замавнуваше кон хеликоптерот, кој се спушти да полни вода, за да ги гасне пожарите.

Пожари беснеат и во Грција, Албанија, и Турција. Во Грција, 15 пожарникари се повредени додека во Албанија денеска има една жртва во округот Елбасан, а ден претходно, 80-годишен маж загинал додека палел пожар во својот двор. Од синоќа голем пожар беснее и во општина Булќиза, на албанско-македонската граница, кај Дебар. Во Турција пожарите беснеат веќе два дена во покраината Чанаккале, а во Шпанија, од Тре Кантос до Тарифа кај Гибралтар, се евакуирани околу 2.000 луѓе.