Со жалење констатираме дека СДСМ повторно не одговори на суштинските прашања што ја засегаат јавноста. Наместо факти и аргументи, добивме низа квалификации, етикети и обиди за дискредитација, и на поединци, и на медиуми.
Тоа е веќе виден модел:
кога нема одговор на сериозно обвинение, се напаѓа медиумот; кога нема аргументи, се создава дефокус.
Ниту еден ред од соопштението на СДСМ не даде одговор на клучното прашање:
дали е точно или не тврдењето на д-р Жан Митрев дека постоел обид за политичко преземање на неговата болница.
Јавноста не доби демант.
Не доби факти.
Не доби објаснување.
ТВ Алфа постапи согласно основните новинарски стандарди: пренесе јавно и сериозно тврдење и побара став од другата страна. Тоа не е пропаганда, туку професионализам.
Обидите ова прашање да се прикаже како „кампања“ се очигледно бегање од одговори и одговорност. Фокусот не е и не смее да биде медиумот, туку содржината на обвинувањето.
Наместо да се занимава со коментирање на приватни статуси на социјалните мрежи, со анализирање на граматика и синтакса, со квалификации за прекари и псевдоними, СДСМ имаше едноставна можност:
да каже дали обвинението е точно или не.
Таа можност свесно не беше искористена.
ТВ Алфа нема да учествува во дефокусирање, ниту ќе дозволи новинарството да се претвори во мета за политички пресметки. Особено не од оние кои, кога беа на власт, покажаа нетрпеливост кон критички медиуми, вршеа притисоци и се обидуваа да воспостават контрола.
Важно е да се потсети дека додека СДСМ беше на власт, ТВ Алфа беше предмет на бројни институционални проверки и инспекциски контроли. Сите тие постапки завршија без утврдени неправилности. Тоа е документиран факт и јасен показател дека обидите за дискредитација немаат основа.
Како и тогаш, така и денес, ТВ Алфа продолжува да работи професионално и независно, без да подлегнува под политички притисоци.
СДСМ и понатаму има можност да одговори јасно:
дали тврдењето е точно или не.
Сѐ друго е дефокус.
А дефокусот не е одговор.
