Над 45 млади лидери од 25 земји се собраа во Скопје за да разменат идеи и политички визии.На форумот за слобода –значаен меѓународен политички настан кој го организираше Унијата на Млади сили од ВМРО-ДПМЕ се разменија бројни идеи и предлози за подобра иднина на младите. Панел-дискусии за изборни кампањи, дигитална комуникација со гласачите, политики за млади и модели за вклучување на младите во процесите на одлучување.
„Тука е и претставникот на подмладокот на ЕНП. ЕНП е најголемо политичко семејство во Европа. Се обидуваме и со нив да градиме добри односи, добри политички односи. ВМРО-ДПМНЕ е член. Така што низ еден дијалог ќе може Унијата на млади сили да презентира што правевме во изминатиот период и кои се нашите визии и планови за иднината. Посветуваме големо внимание, дали е тоа во делот реформи во образованието, дали е тоа во делот на поддршка на студентите, вработувања на младите лица, обучување и прифаќање на предизвикот на новите технологии коишто доаѓаат. “– изјави потпретседателот на ВМРО-ДПМНЕ, Александар Николовски.
Од Унијата на млади сили на ВМРО-ДПМНЕ додаваат дека овој настан има огромно значење за младите политичари како и голема прилика за разменување искуства.
„ Ова претставува огромна прилика за нас како Унија на млади сили на ВМРО-ДПМНЕ, како да разменуваме искуства што ќе можеме да ги примениме овде во Република Македонија, но, исто така и да градиме контакти за во иднината, бидејќи секој еден од овие млади лидери кои се овде присутни, еден ден ќе ги наследи своите сениорски структури во земјата од која доаѓа, исто и како Унијата на млади сили на ВМРО-ДПМНЕ овде во Република Македонија “– изјави претседателот на УМС на ВМРО-ДПМНЕ, Сергеј Попов.
Интернационалната младинска демократска унија ги обединува младинските подмладоци на партии со слични идеологии, претежно од центар десниот спектар.
